التعلم فوقت الفراغ ماهو عيب #عندي_كلام

مين قال التعلم فوقت الفراغ عيب؟

"غريبة ذي حنان كيف جلست تطالعني وانا قاعدة أقول ابغى أسجل فكورس اونلاين. قال ايش؟ لو قعدتي تتعلمي مين راح يهتم بالاولاد. كنه يعني أولادي ما ينامون ولا يروحون مدارس. كنه يعني ما في شي اسمو تنظيم وقت. كنه يعني خلاص عندي بيت وزوج واولاد يعني خلاص حياتي الشخصية اللي بيني وبين نفسي أتوقفت. طبعاً هذا ما يعني اني أهمل أولادي ربي يحميهم ويديهم الصحة، أكيد راح اهتم بدراستهم ولبسهم وأكلهم وما راح الهى عنهم وهم جنبي. ايش العيب وفين التقصير بذا الشي؟ بس يعني كيف مثلاً عندي وقت لمسلسلاتي ممكن أخلي من ذا الوقت عشان أتعلم شي جديد أنا أبغى اضيفه لمعلوماتي. الحمدلله زوجي محترم رأيي وخلاص كلها ساعة مرتين ثلاثة في الأسبوع. والله اني أشوفها بغير طريقة. أنا علشان همي بيتي وأولادي لازم اهتم بنفسي واغذيها. خلي أولادي يعرفوا إنو ما في حدود لأحلام الشخص والأشياء إلي قادر يحققها. اتمنى من كل قلبي كل وحدة يكون عندها حلم أو أمنية أو شي تبغى تحققه أو تسويه وهى قادرة وعندها الوقت انها ما تقصر بحق نفسها لو ماهي مقصرة بحق اولادها وزوجها وبيتها. لازم نشيل فكرة اني خلاص أتزوجت وصار عندي عيلة يعني خلاص حياتي محورها هما وبس وأنا ما عاد لي أهمية أو أولوية. لازم تكوني من الأولويات كمان علشان حبك ليهم. لازم تكوني من الأولويات علشان لو كنتي واثقة وقوية وناجحة راح يمتثلوا فيكي. اااه..ما علينا.. أشوف؟ ايش كان إسم الموقع حق الكورسات المتوفرة.. يا ربي على ذاكرتي.."

اقرئي أيضاً: "مين قال لازم أنحف"



إختبار الشخصية

هل تُربّين طفلاً ذكيّاً؟